Friday, December 16, 2011

' ദേവദാസി ' എന്നൊരു പടം .... !!



അങ്ങനെ കോളേജ് ഇലക്ഷന്‍ ഒക്കെ കഴിഞ്ഞു ... ആരവങ്ങളും ...!!
അത് കഴിഞ്ഞാല്‍ കഴിഞ്ഞല്ലോ എന്ന് കരുതി ... പക്ഷെ കഴിയുന്നില്ലല്ലോ ...!
നവംബര്‍ അവസാനമായിരുന്നു ഇലക്ഷന്‍ ..,
ഇനി ആകെയുള്ളത് 2 മാസം , ഫെബ്രുവരിയില്‍ കൊന്ന പൂക്കും ...!!
എല്ലാം അവസാനിക്കും ..!
അതിനിടയില്‍ ക്രിസ്മസ് ..! ക്രിസ്മസ് പരീക്ഷ ...,
പരീക്ഷ വേണ്ടെന്നു വയ്ക്കാം .. പക്ഷെ ക്രിസ്മസ് വേണ്ടെന്നു വയ്ക്കാന്‍ പറ്റില്ലല്ലോ ...!

ഇലക്ഷന് മുന്‍പ് എത്ര സമരം ആയിരുന്നു ...!
കുറെ നാളായി ഒരു സമരം ഉണ്ടായിട്ട് , അല്ലേ ചെയര്‍മാനെ ...!
അവിടെയിവിടെയൊക്കെയിരുന്നു പ്രീഡിഗ്രീക്കാര്‍ പരിഭവം പറഞ്ഞു ...!
എന്നാല്‍ , സമരം ഡിഗ്രീക്കാര്‍ക്ക് വേണ്ട ..! പഠിക്കണം എന്ന ആഗ്രഹമുണ്ടായിട്ടൊന്നുമല്ല ..
സമരം ആയാല്‍ പെണ്‍കുട്ടികള്‍ ഉടന്‍ വീട്ടില്‍ പോകും ..
അതിലും ഭേദം ഫുള്‍ ടൈം ക്ലാസ്സ്‌ ഉണ്ടാകുന്നതാണ് ..
ഒരു മൂന്നര വരെ അവര്‍ ക്യാമ്പസില്‍ ഉണ്ടാവൂല്ലോ ..!
സൊ .. സമരം വേണ്ട ..!


അന്ന് വെള്ളിയാഴ്ച ..
രാവിലെ ഹോസ്റ്റലില്‍ നിന്നു കടയില്‍ ഫോണ്‍ ചെയ്യാന്‍ പോയ,
ഹോസ്റ്റലിലെ എന്റെ അടുത്ത മുറിയില്‍ താമസിക്കുന്നവന്‍ ഉച്ചത്തില്‍ വിളിച്ചു പറഞ്ഞത് കേട്ടാണ്
ഞാന്‍ ഉണര്‍ന്നത് ...
" ഡാ .. നമ്മുടെ ' മാസി 'ല്‍ ഇന്ന് ' ദേവദാസി ' എന്നൊരു പടം റിലീസ് ...!
പോസ്റ്റര്‍ കാണണം മോനേ ...!, മലയാളാ ... !!!"
ഞാന്‍ ഉള്‍പ്പെടെ ഒട്ടുമിക്ക ആളുകളും അന്ന് വൈകീട്ട് വീട്ടില്‍ പോകാന്‍ ഇരിക്കുന്നു ...ഇനി രണ്ട് ദിവസം അവധി ..!

"ചതിച്ചല്ലോ ..! , തിങ്കള് വരെ വെയിറ്റ് ചെയ്യെ ..? .. നോ ..നോ ... , അപ്പൊ ഇന്ന് സമരം ..!"
ആരോ സ്വയം അതങ്ങ് ഡിക്ലയര്‍ ചെയ്തത് ഞാന്‍ കിടക്കപ്പായയില്‍ കിടന്ന്‌ കേട്ടു.

എണീറ്റ്‌ കുളിച്ച് , തേച്ചു വടിയാക്കി വച്ചിരുന്ന വെള്ള ഷര്‍ട്ടും മുണ്ടും ഉടുത്ത് ..
ഒരു നുള്ള് പൌഡര്‍ എടുത്ത് വെളുത്ത ഒരു കുറിയും വരച്ചു ഹോസ്റ്റലിന്റെ സൈഡിലൂടെ കോളേജിന്റെ മുറ്റത്തേക്ക് കാലെടുത്തു വച്ചില്ല ..രാവിലത്തെ ഓട്ടം കഴിഞ്ഞു തിരുച്ചു വരുന്നുണ്ടായിരുന്ന ബി.പി .ഈ.ക്കു പഠിക്കുന്ന പെണ്‍കുട്ടികള് ചോദിച്ചു ..
" ചേട്ടാ .. ഇന്ന് സമരാ ... ? "
"നോക്കട്ടെ , പത്രത്തിലുണ്ടോന്ന് ...?" ഞാന്‍ മറുപടി പറഞ്ഞു ..
" അല്ല ... ഞങ്ങടെ സീനിയേര്‍സ് സ്പോര്‍ട്സ് ഹോസ്റ്റലില്‍ പറയുന്നുണ്ടായിരുന്നു ...!"
അതും പറഞ്ഞ്‌ ആ ഫിസിക്കല്‍ എജുക്കേഷന്‍ കുട്ടികള്‍ തിരിച്ചു സ്പോര്‍ട്സ് ഹോസ്റ്റലിലേക്ക് ...


എന്റെ കയ്യിലെ ഏക നോട്ട് ബുക്ക്‌ ക്ലാസ്സില്‍ ഒന്ന് എത്തിച്ചു എന്റെ സാന്നിധ്യം ക്ലാസ്സില്‍ അറിയിക്കുന്ന ഒരു ചടങ്ങ് ഉണ്ട് ... !
അതിനായി , വരാന്തയിലൂടെ ക്ലാസ്സ്‌ മുറിയിലേക്ക് പോകുമ്പോള്‍ ഒരു അമ്പതു പേരെങ്കിലും എന്നോട് ചോദിച്ചു ..
" ഇന്ന് സമരാ ലേ ...? "


ദാ .. പ്രീ ഡിഗ്രി കാര് വരുന്നു ...! ,
" മെമ്മോ കൊടുത്താ .. പ്രവീണ്‍ ചേട്ടാ ..."
" ഈ നിലക്ക് പോയാല്‍ പ്രിന്‍സിപ്പല്‍ ഒരു മെമ്മോ എനിക്ക് തരും ...!!"
അതിനിടയില്‍ , യൂണിറ്റ് പ്രസിഡന്റും സ്കൂള്‍ കാലം തൊട്ടേ എന്റെ സുഹൃത്തുമായ അരുണ്‍ വന്നു ..
യൂണിയന്‍ ഭാരവാഹികളായ ഷെജിന്‍ , ജോജോ , ഡെല്‍ജോ , ഷിബു, അക്കിഫ് എന്നിവര്‍ കൂടെയുണ്ട് ...!

" ഇന്ന് സമരമാണോ പ്രവീണേ ...! "
" ആ.. അറിയില്ല .. എല്ലാരും പറയുന്നുണ്ട് , പത്രത്തില്‍ ഒന്നും കണ്ടില്ല ...!
ആഹ്വാനം വല്ലതും ഉണ്ടോ ജോജോ ..??"
" ഏയ് ...!! " ജോജോ പറഞ്ഞ്‌ തീര്‍ന്നില്ല ...
ഡിന്റോ ആണോ റെനീഷ് ആണോ എന്നറിയില്ല , ആരോ ഒരാള്‍
പോക്കറ്റില്‍ നിന്ന് ഒരു ' പാസ്‌ പോര്‍ട്ട്‌ സൈസ് ഫോട്ടോ' സൈസിലുള്ള
ഒരു പത്രക്കഷ്ണം എന്റെ നേരെ നീട്ടി ...

" പ്രവീണ്‍ ചേട്ടന്‍ ഇതൊന്നു നോക്കിയേ ...? "
എന്റെ ഇടതു ഉള്ളംകയ്യില്‍ വച്ച് ആ പത്രത്തിന്റെ തുണ്ട് എടുത്ത് ഉറക്കെ വായിച്ചു ..
" ....... ജില്ലയില്‍ ഇന്ന് പഠിപ്പ് മുടക്കും , വിദ്യാര്‍ഥികളെ മര്‍ദ്ദിച്ചതില്‍ പ്രതിഷേധിച്ചു
പഠിപ്പ് മുടക്കുമെന്നു ജില്ലാ പ്രസിഡണ്ട്‌ ..."

" കണ്ടില്ലേ ..? കണ്ടില്ലേ ..? " പ്രീഡിഗ്രീക്കാര്‍ ആവേശഭരിതരായി ...
" ഡാ ,ഇത് ഇന്നത്തെ പേപ്പറാണോ .. ഏത് ജില്ലയാ ...!! " എന്റെ സംശയം തീര്‍ന്നില്ല ..
എന്റെ ചിരി കണ്ട് കൂടെയുള്ള ഒരുത്തന്‍ പറഞ്ഞു ..
" കണ്ടാ .. കോളേജ് ഇലക്ഷന്‍ കഴിഞ്ഞപ്പോള്‍ ഓരോരുത്തരുടെ സ്വഭാവം മാറുന്നത് കണ്ടാ ..
ചേട്ടാ ...ഇത് ശരിയല്ല ട്ടാ..."
ആ പയ്യന്‍ ആകെ സെന്റിമെന്റല്‍ ആകുന്നു ...
" ഞങ്ങള്‍ക്ക് ഒരു ആവശ്യം വരുമ്പോള്‍ ...!" അവന്‍ പിന്നെ എന്റെ നേരെ പോലും നോക്കാതെ ദേഷ്യത്തോടെ മുഖം തിരിച്ചു ...!!
" ഏയ് ..!" ഞാന്‍ അവന്റെ തോളില്‍ കയ്യിട്ടു ...
" വേണ്ട ..." അവന്‍ പിണങ്ങി ..

ആദ്യ ബെല്ലടിച്ചപ്പോള്‍ മനസ്സില്ലാമനസ്സോടെ ഒരു ലെറ്റര്‍പാഡ് എടുത്ത് ,
അതില്‍ പഠിപ്പ് മുടക്കുവാനുള്ള കാരണവും എഴുതി
അവര്‍ തന്ന ' പേപ്പര്‍ കട്ട്‌ ' അതില്‍ പിന്‍ ചെയ്തു പ്രിന്‍സിപ്പാളിന്റെ മുറിയിലേക്ക് കയറി പോകുമ്പോഴേക്കും
താഴെ മുദ്രാവാക്യം വിളി തുടങ്ങിയിരുന്നു ...
പ്രിന്‍സിപ്പല്‍ ഞെട്ടി പോയി .. " എന്താ ഡാ ഇത് ...!"
"ഇന്ന് സമരാ ..ഫാദറെ .." കൂടുതല്‍ ഒന്നും പറയാന്‍ നില്‍ക്കാതെ പടിയിറങ്ങിയപ്പോള്‍ കണ്ട കാഴ്ച ..!


അഞ്ചു വര്‍ഷത്തെ എന്റെ കലാലയ ജീവിതത്തില്‍ ഇന്നേ വരെ കണ്ടിട്ടില്ലാത്ത ഒരു ജനക്കൂട്ടം ...!!!
ഇത്രക്കും വൈകാരികമായി വിദ്യാര്‍ഥികള്‍ സമരത്തെ കണ്ട ഒരു സാഹചര്യം അതിനു മുന്‍പ് ഉണ്ടായിട്ടില്ല ..
ഞങ്ങള്‍ വിദ്യാര്‍ഥി നേതാക്കളില്‍ നിന്നും അവര്‍ ആ സമരം ഏറ്റെടുത്തു ,
അവര്‍ തന്നെ അത് ഒരു ചരിത്രവിജയം ആക്കുന്നു ..
ഏതൊരു വിദ്യാര്‍ഥി നേതാവും പകച്ചു പോകുന്ന നിമിഷം ..

മീറ്റിങ്ങിനോ ഇലക്ഷണോ , എന്തിന് ഇതിനു മുന്‍പുണ്ടായിരുന്ന ഒരു സമരത്തിന്‌ പോലും
കാണാത്തവര്‍ ....ഈ സമരത്തിന്റെ മുന്‍പന്തിയില്‍ ...!!

" ഞങ്ങളിലുണ്ട് കെ .എസ്‌ .യു ... !
ഞങ്ങളിലുണ്ട് എസ്‌ .എഫ് .ഐ .... !
ഞങ്ങളിലുണ്ട് എ .ബി .വി .പി .... !
വിദ്യാര്‍ത്ഥിക്കൊരു പ്രശ്നം വന്നാല്‍ ..
ഞങ്ങളിലില്ല രാഷ്ട്രീയം ....!!!"
എന്നും രണ്ട് മണിക്കൂര്‍ കൊണ്ട് കാമ്പസ് മുഴുവന്‍ കറങ്ങിയാലും
തീരാത്ത സമരങ്ങളില്‍ നിന്ന് വ്യത്യസ്തമായി
ഒരു മണിക്കൂറിനുള്ളില്‍ കോളേജ് കറങ്ങി തുടങ്ങിയയിടത്ത് തന്നെ
മുദ്രാവാക്യം വിളിച്ചു അവസാനിപ്പിച്ചു അവര്‍ കൂട്ടത്തോടെ സിനിമയ്ക്ക് പോയി ...


വിജനമായ ക്യാമ്പസ്‌ ..! ചെമ്പകച്ചോട്ടില്‍ ആര്‍ക്കെയോ ഇരുന്ന് പുകയ്ക്കാറുണ്ട് ..
അവരെയും കാണാറില്ല ..! ഓഡിറ്റോറിയത്തിനരികിലൂടെ ചില പെണ്‍കുട്ടികള്‍ വരുന്നുണ്ട് ..
അവരെയൊക്കെ കാണുമ്പോള്‍ പഞ്ചാരയടിക്കാന്‍ വരാറുള്ള
സ്ഥിരം ഗ്ലാമര്‍ താരങ്ങള്‍ പോലും കോളേജില്‍ ഇല്ല ...!

ക്ലാസ്സില്‍ കൊണ്ട് വച്ച ആ ടൈറ്റാനിക് സുന്ദരിയുടെ പുറംചട്ടയുള്ള നോട്ട് ബുക്ക്‌ എടുത്ത്
വെറുതെ ഒന്ന് മറിച്ച് നോക്കി കൊണ്ട് ഞാന്‍ ആ പാതിമതിലില്‍ ..
ഒരു കിലോമീറ്റര്‍ അകലെ നിന്ന് വരുന്നുണ്ടെങ്കിലും ശബ്ദം കൊണ്ട് തിരിച്ചറിയാവുന്ന ..
എന്നാല്‍ കണ്ടാല്‍ ആരും അത്ഭുതത്തോടെ കേരള സംസ്ഥാനം രൂപീകരിക്കുന്നതിനു
മുന്‍പുള്ളതാനോ ആ വണ്ടി എന്ന്സംശയിച്ചു നമ്പര്‍ പ്ലേറ്റില്‍ നോക്കി പോകുന്ന ...
തന്റെ പഴയ സ്കൂട്ടറില്‍ ഗമയോടെ ചാരിയിരുന്നു ...

" അല്ല അരുണേ , ഇനി നമ്മളായിട്ട് എന്തിനാ ..പോകാതിരിക്കുന്നെ ..!?"
" എങ്ങോട്ട് ..? " അരുണിന് ഒന്നും മനസ്സിലായില്ല ..
" അല്ലാ .. ആ സിനിമയ്ക്ക് ...!!, ഇപ്പൊ ഹോസ്റ്റലില്‍ പോയാല്‍ ഒരുത്തനും ഉണ്ടാവില്ല ..,
കാന്റീനില്‍ ചെന്നാല്‍, വെള്ളിയാഴ്ച സമരം എടുത്തിട്ട് എന്തേ നേരത്തെ ഒന്നും പറയാഞ്ഞേ ,
രാവിലെയെങ്കിലും കണ്ടപ്പോള്‍ പറയാഞ്ഞില്ലേ , എന്ന കുട്ടപ്പന്റെ പരിഭവം കേള്‍ക്കാം ...
പൊറോട്ട ഫുള്‍ വേസ്റ്റ് ആയീനുള്ള വിഷമവും ... !"
" എന്നാലും ...! " അരുണിന് ധൈര്യം വരുന്നില്ലല്ലോ ..

" പിന്നെ സിനിമയ്ക്ക് പോയവര്‍ മിക്കവരും അഞ്ചു രൂപയുടെ തറയില്‍ ആയിരിക്കും , കാര്യം രാത്രി ഹോസ്റ്റലീനു പോകുമ്പോള്‍ ഞാനും അഞ്ചു രൂപയുടെ ടിക്കറ്റിലാണ് ഇരിക്കാറ് .. നമുക്ക് ഇന്ന് പത്തില് ഇരിക്കാം ...!!"
" സിനിമ ഭയങ്കര മസാലയാ ..! നീ പോസ്റ്റര്‍ കണ്ടില്ലേ ? " അരുണ്‍ അടുക്കുന്നില്ലല്ലോ ..
" അല്ലടാ .. വൈശാലി ടൈപ്പ് ക്ലാസ്സിക്‌ സാധനം ആയിരിക്കും ...!
പിന്നെ എനിക്ക് കഴിഞ്ഞ വര്‍ഷം പ്രായപൂര്‍ത്തിയായി ...! "
" അത് എനിക്കും ആയി ... എന്നാലും പിള്ളേര് കണ്ടാല്‍ ..!!?"
" കണ്ടാല്‍ എന്താ , നമ്മളും അവരെ പോലെ മനുഷ്യന്മാരല്ലേ ...?" ഞാന്‍ വീണ്ടും ധൈര്യം കൊടുത്തു ...
" പോണാ ....? " അരുണിന്റെ സംശയം തീരുന്നില്ലല്ലോ ....
" നിനക്കറിയോ , ' ദേവദാസി ' ഒരു സാമൂഹ്യ പ്രസക്തിയുള്ള സിനിമയായിരിക്കും ..!
നമ്മുടെ രാജ്യത്തില്‍ നിലവിലുണ്ടായിരുന്ന ....."
"ശരി പോകാം ...!!" അരുണ്‍ വേഗം സമ്മതിച്ചു ...

" ഇപ്പൊ വേണ്ട ..! " അതും ഞാന്‍ തന്നെയാ പറഞ്ഞത്
" പിന്നെ ...!" ഉറങ്ങുകയായിരുന്ന കുട്ടിയെ വിളിച്ചെണീപ്പിച്ചിട്ട് എന്ന ഭാവം അരുണിന് ...
" ഒരു പത്ത് മിനിറ്റ് കൂടി കഴിയട്ടെ ... , ഇപ്പൊ വേണ്ട , പിള്ളേര് മുഴുവന്‍ തിയറ്ററിലേക്ക് ഒന്ന് കേറട്ടെ ..
പടം തുടങ്ങി ഒരു അഞ്ചു മിനിട്ട് കഴിഞ്ഞു നമ്മള് കയറുന്നു ...പടം കാണുന്നു ..!"
'വാട്ട് ആന്‍ ഐഡിയ സര്‍ജി ! ' എന്ന് അന്ന് പറയാന്‍ ഐഡിയ പോയിട്ട്
ഒരു മൊബൈല്‍ ഫോണ്‍ പോലും ഞങ്ങളുടെ ആരുടേയും കയ്യില്‍ ഇല്ല ..!!

അരുണിന്റെ പഴയ സ്കൂട്ടറില്‍ ഞങ്ങള്‍ തിയറ്ററിലേക്ക് ...
" പതുക്കെ പോയാല്‍ മതി ...!" ഞാന്‍ പിന്നില്‍ നിന്ന് നിര്‍ദ്ദേശം കൊടുത്തു ..

എപ്പോഴും ആള് കാണാറുള്ള തിയറ്റര്‍വഴി അന്ന് ശൂന്യം ...!
അവിടെയെത്തിയിട്ടും ഒരു ആളെനക്കവും ഇല്ല .. സിനിമ തുടങ്ങിയിരിക്കുന്നു ...
പച്ച ഐഡന്റിറ്റി കാര്‍ഡിന്റെ ഉള്ളിലുള്ള ഇരുപതു രൂപ എടുത്ത് പതിവില്‍ നിന്നും
വ്യത്യസ്തമായി ഞാന്‍ കൊടുത്തു കൊണ്ട് പറഞ്ഞു ..
" രണ്ട് ഫസ്റ്റ് ...! " കാശ് വാങ്ങി അയാള്‍ പെട്ടിയിലിട്ടു .. ആ പെട്ടി നിറഞ്ഞു കിടക്കുന്നു ...
" ചേട്ടാ .. അറിയോ ,ആ പെട്ടി നിറയാനുള്ള കാരണക്കാര്‍ ആണ് ഞങ്ങള്‍ ..
ശരിക്കും ഞങ്ങളുടെ കയ്യില്‍ നിന്ന് കാശ് വാങ്ങാന്‍ പാടില്ലാത്തതാണ് ..
പക്ഷെ , ഓ . സി . ഞങ്ങള്‍ക്ക് വേണ്ട ..!!" എന്റെ മനസ്സു പറഞ്ഞു ..

" പടം തുടങ്ങി ... വേഗം ചെല്ല് ..!!"
" താന്‍ വല്യ ഭാരിച്ച കാര്യം അന്വേഷിക്കേണ്ട .. കാശ് കൊടുത്തു ടിക്കറ്റ്‌ വാങ്ങിയ ഞങ്ങള്‍ക്കറിയാം ..!
വേഗം പോണോ പതുക്കെ പോണോ എന്നൊക്കെ .." എന്ന് കൂടി മനസ്സില്‍ പറഞ്ഞു ഞങ്ങള്‍
അല്പം കൂടി പതുക്കെ നടന്നു ..
വാതില്ക്കല്‍ നില്‍ക്കുന്ന അമ്മാവന്‍ ടിക്കറ്റ്‌ പകുതി കീറി ഞങ്ങള്‍ക്ക് തന്നു ...
വാതില്‍ തുറന്നു ...എങ്ങും നിശബ്ദത ...! കൂരാകൂരിരുട്ട്‌ ....!

ഞങ്ങള്‍ രണ്ട് പേരും 'ടോം ആന്‍ഡ്‌ ജെറി ' സിനിമയിലെന്ന പോലെ പതുങ്ങി മെല്ലെ അകത്തേക്ക് ...
വാതില്ക്കല്‍ വച്ച് ടിക്കറ്റ്‌ വാങ്ങിയ അമ്മാവന്‍ മര്യാദക്കാരനാ ... !!
ഞങ്ങള്‍ അകത്തേക്ക് കയറിയ ഉടന്‍ തിയറ്ററിനുള്ളിലെ ലൈറ്റ് ഇട്ടു ..!
സീറ്റ് കണ്ട് പിടിക്കാന്‍ സഹായിച്ചതാ .. അയാളുടെ ഒരു സഹായം @ ## $ *& & !!.
ഞങ്ങളുടെ വെള്ളകുപ്പായം ആ വെളിച്ചത്തില്‍ വെള്ളിത്തിരയേക്കാള്‍ മിന്നിത്തിളങ്ങി ...!

സമരം കാരണം ആദ്യ പത്ത് മിനിട്ടിനുള്ളില്‍ തന്നെ അഞ്ചു രൂപയുടെ
തറടിക്കറ്റ് മുഴുവനും വിറ്റ് കഴിഞ്ഞത് കൊണ്ട്
പിന്നെ എല്ലാരും പത്തിന്റെ ടിക്കറ്റ്‌ എടുത്തുവെത്രേ ....!
ആ വെളിച്ചത്തില്‍ സീറ്റ് അന്വേഷിക്കുന്ന ഞങ്ങളെ കണ്ട ഉടനെ പിറകില്‍ ഇരുന്നിരുന്ന
ആരോ ഉച്ചത്തില്‍ വിളിച്ചു പറഞ്ഞു ...

" അഭിവാദ്യങ്ങള്‍ ... അഭിവാദ്യങ്ങള്‍ ..!!"
തിയറ്ററിലെ വിദ്യാര്‍ഥി സമൂഹം ഏറ്റു വിളിച്ചു ....
" അഭിവാദ്യങ്ങള്‍ ... അഭിവാദ്യങ്ങള്‍ ..!!"

വെള്ളിത്തിരയില്‍ നായികയെ എണ്ണപുരട്ടി തോഴിമാര്‍ കുളിപ്പിക്കുമ്പോള്‍ ....
വിദ്യാര്‍ഥി സമൂഹം ഒരേ സ്വരത്തില്‍ ഏറ്റു വിളിക്കുന്നുണ്ടായിരുന്നു ...

" സമര നേതാക്കള്‍ക്കഭിവാദ്യങ്ങള്‍ ...
നേരുന്നു .... ചാര്‍ത്തുന്നു ......!! "

11 comments:

  1. mashee...
    mashude srushtikalellam onninonnu mechamakunnund. mashude anubavangalonnum palichakalallatto.oro anubavangaleyum njangal hrudayathilekku avahikkunnund. pazhaya kalathilek oru thirichu pokku nadathan sahayichathinu mashinu orayiram asamsakal...

    ReplyDelete
  2. മാഷെ വായിചു ബോധിചിരിക്കുന്നു

    ReplyDelete
  3. വായിച്ചു
    ഇനിയും പ്രതീക്ഷിക്കുന്നു

    ReplyDelete
  4. ദേവദാസി ,, വിജാരിച്ച അത്ര നിലവാരത്തില്‍ എത്തിയില്ല , എന്ന ഒരു പോയിന്റ്‌ കൂടെ ഉള്‍പ്പെടുത്താമായിരുന്നു ,, വായനക്കാര്‍ക്ക് ഒരു തെറ്റിധാരണ വേണ്ടല്ലോ എന്ന് വിചാരിച്ചു പറഞ്ഞതാ

    ReplyDelete
  5. വളരെ നന്നായിരിക്കുന്നു ....... Good narration....കഥയില്‍ ചോദ്യം ഇല്ല എങ്കിലും... ഒരു സംശയം... അന്ന്‍ പത്രകുറിപ്പ് കിട്ടിയിരുന്നോ ?

    പിന്കുറിപ്പ്: "എന്നാലും അത് ആരായിരിക്കും ?"

    ReplyDelete
  6. നിങ്ങള്‍ക്ക് വേണ്ടി ആര്‍ത്തു വിളിക്കാന്‍ ഞാനും അന്ന് തിയ്യറ്ററില്‍ ഉണ്ടായിരുന്നില്ലേ എന്ന് സംശയം!

    ഞാന്‍ Pre-Degree second year (1999) പഠിക്കുമ്പോള്‍, സമരം ദാഹിച്ചു, ഞങ്ങള്‍ അന്ന് കോളേജില്‍ നിലവില്‍ ഇല്ലാതിരുന്ന ABVPക്ക് വേണ്ടി സമരം വിളിച്ചു വിജയിപ്പിച്ച ഒരു episode ഉണ്ടായിരുന്നു.

    ReplyDelete
  7. മാഷെ,
    ഞാന്‍ ഒരു വി.കെ.എന്‍. ഫാനാണ്. സൂര്യനു താഴെയുള്ള എന്തും സരസമായി ആവിഷ്കരിക്കുന്ന മാഷിന്റെ ശൈലി വളരെ ഇഷ്ടമായി. ഒപ്പം അതിലെ കാര്യങ്ങളും.

    ഒരു കാര്യം പറഞ്ഞാല്‍ പോസിറ്റീവ് ആയി എടുക്കുമല്ലോ?

    The width of posting area not seems to be adequate. The right hand side bar is too large.
    While letters on black back ground also not looking so nice. A light back ground with black letters may more friendly to eyes.

    വായനക്കാരന്‍റെ സ്വാതന്ത്ര്യം ഉപയോഗിച്ചത് മുഷിവുണ്ടാക്കില്ലല്ലോ?

    ReplyDelete
  8. ദേവദാസി കാണാന്‍ ആദ്യം തിരക്കയിരുന്നെങ്കിലും പിന്നീട് പ്രതീക്ഷിച്ചവയോന്നും കിട്ടഞ്ഞതിനാലവാം ആ പടം പരാജയപ്പെട്ടത് .നര്‍മ്മരസം തുളുമ്പുന്ന പോസ്റ്റില്‍ ചിലയിടത്ത് കഥയുടെ ഒഴുക്ക് തടസ്സപ്പെട്ടു ,ആശംസകള്‍

    ReplyDelete
  9. Praveen chetta nanni orupadu --- Devadasi release datile samaram ormipichathinu.Annu Devadasi kandirangiya Arun chetanodu nyan chyothichu Arun chetta ningalum,appol Arun Chettan iprakaram marupadi paranyu "Enthe nagalkku ithonnum padille.

    ReplyDelete